Ноябрĕн   16-мĕшĕнче   Шĕнерпуçĕнчи   И.Я. Яковлев   ячĕпе   хисепленекен   шкулта   кăвар   чĕреллĕ   поэтăмăр   Çеçпĕл    Мишши    çуралнăранпа   110   çул    çитнине     халалласа   поэзии   каçĕ   иртрĕ.    Унта   5-9   классенче   вĕренекенсем    активлă    хутшăнчĕç,   8   класра   вĕренекенсем   уява   ертсе   пычĕç.

      «Хастарлă,   хыт   утăмлă    пулăр,

       Çĕршывăн   хастар   ачисем.

       Вут  кайăклăн   вĕçĕр,   ан   юлăр,

      Ан   юлăр   кун-çул   уттинчен»

çакăн   пек   сăмахсемпе  пуçланчĕ   уяв   каçĕ.    Чи   малтанах   Çеçпĕл   Мишшин   пурнăçĕпе    пултарулăхĕ,   чăваш   поэзийĕн   никĕсне   хываканĕ    çинчен   тăван    чĕлхене   вĕрентекен   Н.А. Петрова   каласа   кăтартрĕ.    «Чăваш   литератури   тÿпинче   икĕ    çутăран   та   çутă   çăлтăр    ялкăшать:   пĕри  -  К.Иванов,   тепри  -  Çеçпĕл   Мишши»,-    тенĕ   чăваш    халăх   поэчĕ    Петĕр   Хусанкай.

        Ун    хыççăн   8-мĕш    класра   вĕренекенсем   Г. Кузьминăн   «Пиччем   çинчен»   кĕнеки    тăрăх    чи   интереслĕ   самантсемпе    пулăмсем    çинчен    каласа   кăтартрĕç:   «Ача   çуралсанах»   сыпăка    С. Шемарин;   «Шкулччен»   сыпăка   С. Журавлев;   «Хĕллехи   кунсенче»   сыпăка   А. Кириллов;   «Сысна   кĕтĕвне   сыхлани   сыпăка   А. Степанова;   «Тăмран   тунă    кĕлеткесем»     сыпăка   Н. Матвеева   тата   ыттисем   те   хăйсен    ролĕсене   тĕлĕнмелле,   артистсем   пек   выляса   каласа   кăтартрĕç.    

       Сăвă   калакансен  конкурсĕнче   1   вырăн – Никифоров  Максим,  2  вырăн – Кипригина  Юлия,   3  вырăн – Иванова  Кристина   йышăнчĕç.

        «Кам     Çеçпĕле   лайăхрах   пĕлет?»   вăйă-конкурсра: 1.Андреева   Екатерина – 8   класс;   2. Витальева   Лидия – 6  класс;   3. Кириллов   Алексей – 8  класс    малти   вырăнсене   йышăнчĕç.

         Çеçпĕл   Мишшин   юратăвĕ   çинчен   те    кăсăкланса   итлерĕç   ачасем,   Анастасия   ĕЧервякова   вырăс   хĕрарăмĕпе   Наталья   Николаевна   Рубис    украинка   патне   çырнă   çырăвĕсемпе    сăввисене   вуласа   аса   илчĕç.   (Анастасия   Червякова   патне   янă   98    çырăвне    «Чунăмçăм,    çунатăмçăм…»   ятпа   пичетленнĕ   пысăках   мар   кĕнеке   тăрăх   «Ялав»   журнал   редакцийĕ   1-2  №   1989  çул   пичетленĕ;   Наталья   Рубис   Çеçпĕл    Мишши    çинчен   çырнă   сăввисене:   «Ĕмĕт»,   «Мишша   ятне»,   «Çеçпĕлпе   Шевченко»   тата   ыттисем   те   ачасене   вут-çулăмлă    çырусем    çырма   хăнăхтараççĕ.    Çеçпĕл   Мишшин   сÿнми   туйăмĕсем    ачасене   интереслентерсе   ячĕç.  

        Çеçпĕл   сасси  -  пĕтĕм   чăваш   сасси.    Ахальтен   мар   вăл   çырнă    çак   йĕркесем   паян   кун   та   вилĕмсĕр:

        «Кăвар   чĕрем  -  пин   çын    чĕри, 

          Эп   пĕр   çын   мар  -  эп  хам   пин-пин.

          Эп   пин   чăваш,   эп   пин-пин   çын!

          Чĕрем   юрри  -  пин    çын   юрри.»

   Уяв   саманчĕсем    ачасен    асĕнче    нумайлăха    асра   юлĕç.